Nos últimos meses temos recibido un bombardeo de nomes raros de seres que conviven entre nós e mesmo dentro de nós. E… nós sen sabelo. Menos mal que a sabedoría xaolín nos acompaña…
NEUMOCOCO
NEMATODO
Sabiades que Galicia é a única comunidade do Estado onde vacinan aos nenos contra o NEUMOCOCO? Se os vacinan será porque este ser case descoñecido habita en nós desde ben pequenos. Non sabemos que foi o fotógrafo pero temos unha imaxe (movida claro) deste bicho. Outro animaliño que se fixo famoso nestes días foi o NEMATODO (Non é un peixe como Nemo) que lle deu por trincar todo canto piñeiro houbese. Por isto, os nosos paisanos deron en chamarlle «Levatodo». Parece ser, segundo os expertos xaolíns, que é da familia dos bursaphelenchus xylophilus e transmíteo o psicodioscórides. Con estes nomes, claro, a Xunta non dá acabado con el e así nos vai: millóns de euros en perdas. E que non se estenda!
VIEITEZIANA
Outro bicho que convive con nós e a Vieitezia luzmurubeae (non é vasco) da familia dos nemertinos (non é unha tribo galaica) e foi atopada, que xa é dicir co pequena que é, nas Illas Cies. Uns científicos fodechinchos andiveron a fuchicar no mar e atopárono a pesar de que só mide 2 cm. O condenado do bicho, co pequeno que é, resulta que é hermafrodita e, claro, dálle por «introducirse» nas ascidias para… reproducirse!
Mais a cousa non queda aí pois estes mesmos expertos en localizar bichos pequenos xa tiñan atopado anos atrás ao lineo longuisimus: Unha miñoca mariña de… 30 metros de longo! Esta vez foilles máis fácil dar do bicho. Agora xa só queda por averiguar se estes bichos son comestibles o que sería moi importante para acrecentar a xa escasa fauna das rias e así poder crear outra festa gastronómica: A FESTA-PAPAROTA DO LINEO. EN CALDEIRADA DECONSTRUÍDA.
Xaolin 