PAXAROS CALADOS NON FAN MAL AGOIRO

Este refrán valía hai anos na nosa Galicia supersticiosa pero o que está a pasar con estes voadores xa nos tén mosqueados. Miramos unha vez como nos incríbles Estados Unidos chovían ras e logo dixeron que fora un tornado que as elevou e que as soltou cando parou a sua voráxine ventoleira. Pero que 5.000 merlos caian fulminados todos xuntos en Arkansas xa é cousa de meigas. Bueno, o pobo onde aconteceu isto chámase Beebe e en principio pensamos nunha alucinación etílica dos seus moradores. Logo, os expertos dixeron que se morreran de estrés causado polos fogos artificiais, que se polas condicións meteorolóxicas (treboada con saraiba), que se por o tornado de turno… Bueno, o caso é que agora xa ninguén se lembra disto, agás nós os «xaolíns» que seguimos pescudando no tema aparecendo casos xa en Europa: En Falkoping (outra vez as copas) na Suecia tamén caeron fulminados deceas de paxaros. Esta vez (ah, a vella Europa intelectual) os científicos dixeron que fora por «violencia física extrema» (?). En Faenza, ao norte de Italia apareceron mortas 400 pombas na estrada de entrada ao pobo. Gli cientifici italiani dixeron co seu punto histriónico e despistado que era unha fábrica da zona con malos fumes, logo que  se foi unha enfermidade vírica ou un envelenamento masivo… Este estudo firmábano os do Instituto Zooprofiláctico de Lugo e xa empezamos a mosquearnos. Logo comprobamos que tamén hai outro Lugo, alá na Emilia – Romana. Que alivio! Xa o estabamos relacionando co asunto das aves na cidade amurallada galega que logo vos contamos. Por se a cousa das aves non chegara, en Alemaña as galiñas enchen os seus ovos de dioxinas nunha porcentaxe 78 veces maior que o normal. Agora si, o talento alemán é o talento alemán: a culpa é dos piensos pois levan exceso de ácidos graxos que provocan unha especie de gripe aviar. Agora saben que o que vendían como BIO xa non é unha garantía e as «galiñas felices» como lles chamaban, resulta que o eran porque estaban dopadas. Que guevos se botan estes teutóns! Claro que esta enfermidade, e pola mesma causa, tamén a transmiten os porcos e a carne de vacún. Coidado co que se come ainda que se nos diga que vale máis paxaro en man que cento voando. Afectaralle isto as escolas infantís da «Galiña Azul»? Olliño!