COBRÓNS

DES-«CABLEADOS» POR CULPA DOS «COBRÓNS»

MODUS OPERANDI - COBRE DO AVE - MONTE DE COBRE

Non, non nos estamos a referir ás «axencias» de cobro tipo El Torero del Frac ou así. Falamos desas xentes que desde hai uns anos e coa cotización do cobre e a «demanda» dos chineses (ao que se ve, son cobrizos e non amarelos como nos contaron na escola franquista) se adican a roubar COBRE: Desmantélannos os tendidos eléctricos, telefónicos, alumados públicos, tractores, coches… e ata as minipimers se se lles tercia. É tal a sua voracidade e dilixencia que xa «mangan» ata o tendido do AVE recén posto e incluso antes de poñelo. Antes actuaban de noite pero agora vístense de «operarios» e deixan sen servizo eléctrico a un pobo enteiro a plena luz do día. E así se produce o milagre consecuente: Dunha furgoneta e non sabemos como (na «fregoneta» seguro que non) o cobre chega á China e despois unha boa parte del volven a vendérnolo nos circuítos dos ordenadores que mercamos e noutros produtos. Negocio redondo! Porque é de ida e volta… E como para «cablearse» con estes «cobróns»!

Xa sabemos que este problema é estatal -díxoo Rubalcaba e xa se sabe… Pero temos unha especial preocupación, ainda non observada (ou si, vai saber) polos «cobróns»: E é que cheguen a arrasar poboacións galegas como Cobraña, Cobreiros ou Santo Andrés e Santa Cristina de Cobres! Que se encomenden a quen sexa! Ou que fagan turnos de vixilia nocturna…